Неделя сыропустная. Вечерня с чином прощения

ДЕВЯТЫЙ ЧАС

Чтец: Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

Псалом 83

Коль возлюбленна селения Твоя, Господи сил! Желает и скончавается душа моя во дворы Господни, сердце мое и плоть моя возрадовастася о Бозе живе. Ибо птица обрете себе храмину, и горлица гнездо себе, идеже положит птенцы своя, олтари Твоя, Господи сил, Царю мой и Боже мой. Блажени живущии в дому Твоем, в веки веков восхвалят Тя. Блажен муж, eмуже есть заступление eго у Тебе; восхождения в сердце своем положи, во юдоль плачевную, в место еже положи, ибо благословение даст законополагаяй. Пойдут от силы в силу: явится Бог богов в Сионе. Господи Боже сил, услыши молитву мою, внуши, Боже Иаковль. Защитниче наш, виждь, Боже, и призри на лице христа Твоего. Яко лучше день един во дворех Твоих паче тысящ: изволих приметатися в дому Бога моего паче, неже жити ми в селениих грешничих. Яко милость и истину любит Господь, Бог благодать и славу даст, Господь не лишит благих ходящих незлобием. Господи Боже сил, Блажен человек уповаяй на Тя.

Псалом 84

Благоволил еси, Господи, землю Твою, возвратил еси плен Иаковль: оставил еси беззакония людей Твоих, покрыл еси вся грехи их. Укротил еси весь гнев Твой, возвратился еси от гнева ярости Твоея. Возврати нас, Боже спасений наших, и отврати ярость Твою от нас. Еда во веки прогневаешися на ны? Или простреши гнев Твой от рода в род? Боже, Ты обращься оживиши ны, и людие Твои возвеселятся о Тебе. Яви нам, Господи, милость Твою, и спасение Твое даждь нам. Услышу, что речет о мне Господь Бог: яко речет мир на люди Своя, и на преподобныя Своя, и на обращающыя сердца к Нему. Обаче близ боящихся Его спасение Его, вселити славу в землю нашу. Милость и истина сретостеся, правда и мир облобызастася. Истина от земли возсия, и правда с Небесе приниче, ибо Господь даст благость, и земля наша даст плод свой. Правда пред Ним предъидет, и положит в путь стопы своя.

Псалом 85

Приклони, Господи, ухо Твое и услыши мя, яко нищ и убог есмь аз. Сохрани душу мою, яко преподобен есмь; спаси раба Твоего, Боже мой, уповающаго на Тя. Помилуй мя, Господи, яко к Тебе воззову весь день. Возвесели душу раба Твоего, яко к Тебе взях душу мою. Яко Ты, Господи, благ, и кроток, и многомилостив всем, призывающим Тя. Внуши, Господи, молитву мою и вонми гласу моления моего. В день скорби моея воззвах к Тебе, яко услышал мя еси. Несть подобен Тебе в бозех, Господи, и несть по делом Твоим. Вси языцы, елики сотворил еси, приидут, и поклонятся пред Тобою, Господи, и прославят Имя Твое, яко велий еси Ты и творяй чудеса, Ты еси Бог един. Настави мя, Господи, на путь Твой, и пойду во истине Твоей: да возвеселится сердце мое боятися Имене Твоего. Исповемся Тебе, Господи Боже мой, всем сердцем моим и прославлю Имя Твое в век. Яко милость Твоя велия на мне, и избавил еси душу мою от ада преисподнейшаго. Боже, законопреступницы восташа на мя, и сонм державных взыскаша душу мою и не предложиша Тебе пред собою. И Ты, Господи Боже мой, щедрый и милостивый, долготерпеливый, и многомилостивый, и истинный, призри на мя и помилуй мя, даждь державу Твою отроку Твоему и спаси сына рабы Твоея. Сотвори со мною знамение во благо, и да видят ненавидящии мя и постыдятся, яко Ты, Господи, помогл ми и утешил мя еси.

Сотвори со мною знамение во благо, и да видят ненавидящии мя и постыдятся, яко Ты, Господи, помогл ми и утешил мя еси.

Слава Отцу и Сыну и Святому Духу и ныне и присно и во веки веков. Аминь.

Аллилуиа, аллилуиа, аллилуиа, слава Тебе Боже. (трижды)

Господи, помилуй. (трижды)

Слава Отцу и Сыну и Святому Духу.

Тропарь воскресный, глас 7:

Разрушил еси Крестом Твоим смерть,/ отверзл еси разбойнику рай;/ мироносицам плач преложил еси/ и Апостолом проповедати повелел еси,/ яко воскресл еси, Христе Боже,/ даруяй мирови// велию милость.

И ныне и присно и во веки веков. Аминь.

Иже нас ради рождейся от Девы/ и распятие претерпев, Благий,/ испровергий смертию смерть и воскресение явлей яко Бог,/ не презри, яже создал еси рукою Твоею./ Яви человеколюбие Твое, Милостиве./ Приими рождшую Тя Богородицу, молящуюся за ны.// И спаси, Спасе наш, люди отчаянныя.

Не предаждь нас до конца Имене Твоего ради,/ и не разори завета Твоего,/ и не отстави милости Твоея от нас/ Авраама ради, возлюбленнаго от Тебе,/ и за Исаака, раба Твоего,/ и Израиля, святаго Твоего.

Трисвятое по Отче наш.

Кондак Триоди, глaс 6:

Премудрости наставниче, смысла подателю,/ немудрых наказателю, и нищих защитителю,/ утверди, вразуми сердце мое Владыко./ Ты даждь ми слово, Отчее Слово,/ се бо устне мои не возбраню,/ во еже звати Тебе:// Милостиве, помилуй мя падшаго.

Господи, помилуй. (40 раз)

Иже на всякое время и на всякий час, на Небеси и на земли, покланяемый и славимый, Христе Боже, Долготерпеливе, Многомилостиве, Многоблагоутробне, Иже праведныя любяй и грешныя милуяй, Иже вся зовый ко спасению обещания ради будущих благ. Сам, Господи, приими и наша в час сей молитвы и исправи живот наш к заповедем Твоим, души наша освяти, телеса очисти, помышления исправи, мысли очисти и избави нас от всякия скорби, зол и болезней, огради нас святыми Твоими Ангелы, да ополчением их соблюдаеми и наставляеми, достигнем в соединение веры и в разум неприступныя Твоея славы, яко благословен еси во веки веков, аминь.

Господи помилуй. (трижды)

Слава Отцу и Сыну и Святому Духу и ныне и присно и во веки веков. Аминь.

Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.

Именем Господним, святейший владыко, благослови.

Иерей: Боже, ущедри ны и благослови ны, просвети лице Твое на ны и помилуй ны.

Чтец: Аминь.

Владыко Господи, Иисусе Христе, Боже наш, долготерпевый о наших согрешениих и даже до нынешняго часа приведый нас, воньже, на Животворящем Древе вися, благоразумному разбойнику иже в рай путесотворил еси вход и смертию смерть разрушил еси: очисти нас, грешных и недостойных раб Твоих, согрешихом бо и беззаконновахом и несмы достойни возвести очеса наша и воззрети на высоту Небесную, зане оставихом путь правды Твоея и ходихом в волях сердец наших. Но молим Твою безмерную благость: пощади нас, Господи, по множеству милости Твоея, и спаси нас Имене Твоего ради святаго, яко исчезоша в суете дние наши, изми нас из руки сопротивнаго, и остави нам грехи наша, и умертви плотское наше мудрование, да, ветхаго отложивше человека, в новаго облецемся и Тебе поживем, нашему Владыце и Благодетелю. И тако, Твоим последующе повелением, в вечный покой достигнем, идеже есть всех веселящихся жилище. Ты бо еси воистинну истинное веселие и радость любящих Тя, Христе Боже наш, и Тебе славу возсылаем со Безначальным Твоим Отцем, и Пресвятым, и Благим, и Животворящим Твоим Духом, ныне, и присно, и во веки веков, аминь.

ВЕЧЕРНЯ

Иерей: Благословен Бог наш, всегда, ныне и присно, и во веки веков.

Чтец: Аминь.

Приидите, поклонимся Цареви нашему Богу.

Приидите, поклонимся и припадем Христу Цареви нашему Богу.

Приидите, поклонимся и припадем Самому Христу, Цареви и Богу нашему.

Псалом 103

Благослови, душе моя, Господа; Господи, Боже мой, возвеличился еси зело, во исповедание и в велелепоту облеклся еси. Одеяйся светом, яко ризою, простираяй небо, яко кожу. Покрываяй водами превыспренняя Своя, полагаяй облаки на восхождение Свое, ходяй на крилу ветреню. Творяй Ангелы Своя духи, и слуги Своя пламень огненный. Основаяй землю на тверди ея, не преклонится в век века. Бездна, яко риза, одеяние ея, на горах станут воды. От запрещения Твоего побегнут, от гласа грома Твоего убоятся. Восходят горы, и нисходят поля в место, еже основал еси им. Предел положил еси, eгоже не прейдут, ниже обратятся покрыти землю. Посылаяй источники в дебрех, посреде гор пройдут воды. Напаяют вся звери сельныя, ждут онагри в жажду свою. На тых птицы небесныя привитают, от среды камения дадят глас. Напаяяй горы от превыспренних Своих, от плода дел Твоих насытится земля. Прозябаяй траву скотом, и злак на службу человеком, извести хлеб от земли. И вино веселит сердце человека, умастити лице елеем, и хлеб сердце человека укрепит. Насытятся древа польская, кедри Ливанстии, ихже еси насадил. Тамо птицы вогнездятся, еродиево жилище предводительствует ими. Горы высокия еленем, камень прибежище заяцем. Сотворил есть луну во времена, солнце позна запад свой. Положил еси тму, и бысть нощь, в нейже пройдут вси зверие дубравнии; скимни рыкающии, восхитити и взыскати от Бога пищу себе. Возсия солнце, и собрашася, и в ложах своих лягут. Изыдет человек на дело свое, и на делание свое до вечера. Яко возвеличишася дела Твоя, Господи, вся премудростию сотворил еси: исполнися земля твари Твоея. Сие море великое и пространное, тамо гади, ихже несть числа, животная малая с великими. Тамо корабли преплавают, змий сей, eгоже создал еси ругатися eму. Вся к Тебе чают, дати пищу им во благо время. Давшу Тебе им, соберут; отверзшу Тебе руку, всяческая исполнятся благости. Отвращшу же Тебе лице, возмятутся: отъимеши дух их, и исчезнут, и в персть свою возвратятся. Послеши Духа Твоего, и созиждутся, и обновиши лице земли. Буди слава Господня во веки, возвеселится Господь о делех Своих. Призираяй на землю, и творяй ю трястися; прикасаяйся горам, и дымятся. Воспою Господеви в животе моем, пою Богу моему, дондеже есмь. Да усладится Ему беседа моя, аз же возвеселюся о Господе. Да исчезнут грешницы от земли, и беззаконницы, якоже не быти им; благослови, душе моя, Господа.

Солнце позна запад свой; положил еси тму, и бысть нощь.

Яко возвеличишася дела Твоя, Господи, вся премудростию сотворил еси.

Слава Отцу и Сыну и Святому Духу, и ныне и присно и во веки веков. Аминь.

Аллилуиа, аллилуиа, аллилуиа, слава Тебе Боже. (трижды)

Диакон: Миром Господу помолимся... (великая ектения)

Господи, воззвах, глас 7

Хор: Господи, воззвах к Тебе, услыши мя./ Услыши мя, Господи./ Господи, воззвах к Тебе, услыши мя: / вонми гласу моления моего,/ внегда воззвати ми к Тебе.// Услыши мя, Господи.

Да исправится молитва моя,/ яко кадило пред Тобою,/ воздеяние руку моею/ – жертва вечерняя.// Услыши мя, Господи.

Стихиры Октоиха покаянны, глас 7:

Стих: Изведи из темницы душу мою,// исповедатися имени Твоему.

Яко блудный сын приидох аз,/ Щедре, приими мя припадающаго,/ яко единаго от наемник Твоих, Боже,// и помилуй мя, Человеколюбче.

Стих: Мене ждут праведницы,// дондеже воздаси мне.

Яко впадый в разбойники и уязвлен:/ тако и аз впадох от многих грехов,/ и уязвлена ми есть душа./ К кому прибегну повинный аз?/ Токмо к Тебе благоутробному душам врачу:// излей на мя, Боже, великую Твою милость.

Стихира Триоди постной, глас 2, подобен:

Стих: Из глубины воззвах к Тебе, Господи,// Господи, услыши глас мой.

Воздержанием тело смирити вси потщимся,/ божественное преходяще поприще непорочнаго поста/ и молитвами и слезами Господа спасающаго нас взыщем,/ и забвение злобы всеконечное сотворим, вопиюще:/ согрешихом Ти, спаси, якоже древле ниневитяны Христе Царю,// и общники ны сотвори Небеснаго Царствия Благоутробне.

Стих: Да будут уши Твои// внемлюще гласу моления моего.

Себе отчаяваю, помышляя дела моя Господи,/ всякаго мучения достойная:/ се бо презрев честныя Твоя Спасе заповеди,/ блудно мое житие иждих./ Темже молюся, тучами покаяния мя очистив,/ постом и молением яко един милостивый просвети,// и не гнушайся мене Благодетелю всех, и Преблагий.

Стихира Богородицы, глас 6:

Стих: Аще беззакония назриши, Господи, Господи, кто постоит?// яко у Тебе очищение есть.

Необоримую стену стяжавше,/ не яко миролюбцы, но яко вернии,/ припадаем к Владычице Деве/ и воспоем, братие, предстательство Тоя.

Стих: Имене ради Твоего потерпех Тя, Господи, потерпе душа моя в слово Твое,// упова душа моя на Господа.

Яко раби, Тебе, Пречистая, взываем:/ не отвержи ны, молящихся Ти,/ но огради нас покровом Твоим.

Стихира Богородицы, глас 5:

Слава Отцу и Сыну и Святому Духу и ныне и присно и во веки веков. Аминь.

Святейшая Херувим и высшая Серафим/ воистинну, Богородице, Ты еси./ Вемы Тя, Заступницу нашу,/ Ты же не престай о нас молящи,/ Державо и Прибежище душам нашим.

Вход с кадилом

Диакон: Господу помолимся.

Молитва входа (тайная)

Иерей: Вечер, и заутра, и полудне, хвалим, благословим, благодарим и молимся Тебе, Владыко всех: исправи молитву нашу, яко кадило пред Тобою, и не уклони сердец наших в словеса или в помышления лукавствия, но избави нас от всех ловящих души наша, яко к Тебе, Господи, Господи, очи наши, и на Тя уповахом, да не посрамиши нас, Боже наш. Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков. Аминь.

Диакон: Благослови, владыко, святый вход.

Иерей, благословляя: Благословен вход святых Твоих всегда, ныне и присно, и во веки веков. Аминь.

Диакон: Премудрость, прости.

Хор: Свете Тихий святыя славы Безсмертнаго Отца Небеснаго, Святаго, Блаженнаго, Иисусе Христе! Пришедше на запад солнца, видевше свет вечерний, поем Отца, Сына и Святаго Духа, Бога. Достоин еси во вся времена пет быти гласы преподобными, Сыне Божий, живот даяй; темже мир Тя славит.

Диакон: Вонмем.

Иерей: Мир всем.

Хор: И духови твоему.

Диакон: Премудрость вонмем. Прокимен великий, глас осьмый:

Не отврати лица Твоего от отрока Твоего, яко скорблю, скоро услыши мя: вонми души моей, и избави ю.

Хор: Не отврати лица Твоего от отрока Твоего, яко скорблю, скоро услыши мя:// вонми души моей, и избави ю. (на каждый стих)

Спасение Твое Боже да приимет мя.

Да узрят нищии, и возвеселятся.

Взыщите Бога, и жива будет душа ваша.

Диакон: Не отврати лица Твоего от отрока Твоего, яко скорблю, скоро услыши мя.

Хор: Вонми души моей, и избави ю.

Сподоби, Господи

Чтец: Сподоби, Господи, в вечер сей без греха сохранитися нам. Благословен еси, Господи, Боже отец наших, и хвально и прославлено имя Твое во веки. Аминь.

Буди, Господи, милость Твоя на нас, якоже уповахом на Тя. Благословен еси, Господи, научи мя оправданием Твоим. Благословен еси, Владыко, вразуми мя оправданием Твоим. Благословен еси, Святый, просвети мя оправдании Твоими.

Господи, милость Твоя во век, дел руку Твоею не презри. Тебе подобает хвала, Тебе подобает пение, Тебе слава подобает. Отцу и Сыну и Святому Духу, ныне и присно и во веки веков. Аминь.

Диакон: Исполним вечернюю молитву нашу Господеви. (ектения просительная)

Иерей: Мир всем.

Хор: И духови твоему.

Диакон: Главы наша Господеви приклоним.

Хор: Тебе, Господи.

Молитва главопреклонения

Иерей: Господи Боже наш, приклонивый небеса и сошедый на спасение рода человеческаго, призри на рабы Твоя и на достояние Твое. Тебе бо страшному и человеколюбцу судии, Твои раби подклониша главы, своя же покориша выя, не от человек ожидающе помощи, но Твоея ожидающе милости и Твоего чающе спасения, яже сохрани на всякое время и по настоящем вечере, и в приходящую нощь, от всякаго врага, от всякаго противнаго действа диавольскаго и от помышлений суетных, и воспоминаний лукавых.

Иерей: Буди держава Царствия Твоего благословена и препрославлена. Отца и Сына и Святаго Духа, ныне и присно и во веки веков.

Хор: Аминь.

Стихиры на стиховне

Стихиры Триоди, глас 4:

Возсия благодать Твоя Господи,/ возсия просвещение душ наших./ Се время благоприятное, се время покаяния,/ отложим дела тьмы, и облечемся во оружия света:/ яко да преплывше поста великую пучину,/ в тридневное Воскресение достигнем,/ Господа и Спаса нашего Иисуса Христа,// спасающаго души наша.

Стих: К Тебе возведох очи мои, живущему на небеси. Се яко очи раб в руку господий своих, яко очи рабыни в руку госпожи своея, тако очи наши ко Господу Богу нашему,// дондеже ущедрит ны.

Возсия благодать Твоя Господи,/ возсия просвещение душ наших./ Се время благоприятное, се время покаяния,/ отложим дела тьмы, и облечемся во оружия света:/ яко да преплывше поста великую пучину,/ в тридневное Воскресение достигнем,/ Господа и Спаса нашего Иисуса Христа,// спасающаго души наша.

Стих: Помилуй нас Господи, помилуй нас, яко по многу исполнихомся уничижения: наипаче наполнися душа наша поношения гобзующих,// и уничижения гордых.

Прославляемый в памятех святых Твоих Христе Боже,/ от них умоляемь,// низпосли нам велию милость.

Богородичен Триоди постной, глас 4:

Слава Отцу и Сыну и Святому Духу, и ныне, и присно, и во веки веков. Аминь.

Ангельстии чини Тя Богомати прославляют:/ Бога бо Всечистая родила еси,/ Отцу, и Духа соприсносущна,/ и ангельская воинства от не сущаго хотением поставивша./ Егоже моли от тли спасти и просветити души православных,// Тя воспевающих Всечистая.

Молитва святаго Симеона Богоприимца

Чтец: Ныне отпущаеши раба Твоего, Владыко,/ по глаголу Твоему, с миром;/ яко видеста очи мои спасение Твое,/ еже еси уготовал пред лицем всех людей,/ свет во откровение языков,// и славу людей Твоих Израиля.

Трисвятое по Отче наш.

Тропари по трисвятом

Хор: Богородице Богородице Дево, радуйся,/ Благодатная Марие, Господь с Тобою:/ благословена Ты в женах/ и благословен Плод чрева Твоего,// яко Спаса родила еси душ наших. (земной поклон)

Слава Отцу и Сыну и Святому Духу.

Крестителю Христов, всех нас помяни,/ да избавимся от беззаконий наших:// тебе бо дадеся благодать молитися за ны. (земной поклон)

И ныне и присно и во веки веков. Аминь.

Молите за ны святии Апостоли, святии вси,/ да избавимся от бед и скорбей:// вас бо теплыя предстатели ко Спасу стяжахом. (земной поклон)

Под Твое благоутробие прибегаем, Богородице,/ моления наша не презри во обстоянии,// но от бед избави ны, Едина Чистая, Едина Благословенная. (без поклона)

Господи, помилуй. (40 раз)

Слава Отцу и Сыну и Святому Духу и ныне и присно и во веки веков. Аминь.

Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.

Именем Господним, святейший владыко, благослови.

Иерей: Сый благословен Христос Бог наш, всегда, ныне, и присно, и во веки веков.

Чтец: Аминь. Небесный Царю, веру утверди, языки укроти, мир умири, святый храм сей (или: святую обитель сию) добре сохрани: прежде отшедшыя отцы и братию нашу в селениих праведных учини, и нас в покаянии и исповедании приими, яко Благий и Человеколюбец.

Молитва Ефрема Сирина

Господи и Владыко живота моего, дух праздности, уныния, любоначалия, и празднословия не даждь ми. (земной поклон)

Дух же целомудрия, смиренномудрия, терпения, и любве, даруй ми рабу Твоему. (земной поклон)

Ей, Господи Царю, даруй ми зрети моя прегрешения, и не осуждати брата моего, яко благословен еси во веки веков, аминь. (земной поклон)

Иерей: Слава Тебе, Христе Боже, Упование наше, слава Тебе.

Хор: Слава, и ныне. Господи, помилуй. (трижды) Святейший владыко, благослови.

Отпуст

Иерей: Воскресый из мертвых Христос, Истинный Бог наш, молитвами Пречистыя Своея Матере, святых славных и всехвальных Апостол (и святаго имярек, егоже есть храм и егоже есть день), святых и праведных богоотец Иоакима и Анны, и всех святых, помилует и спасет нас, яко Благ и Человеколюбец.

Многолетие

Хор: Великаго Господина и Отца нашего Кирилла,/ Святейшаго Патриарха Московского и всея Руси,/ богохранимую страну нашу Российскую,/ настоятеля, братию и прихожан святаго храма сего/ и вся православныя христианы,// Господи, сохрани их на многая лета.

Ис полла эти дэспота.

По окончании вечерни начинается чин прощения. На солею выносятся и полагаются на аналоях напрестольный Крест, иконы Спасителя и Богородицы. Настоятель творит земные поклоны перед ними и целует их. Затем он обращается к присутствующим с поучением о христианском проведении поста и испрашивает прощения грехов у причта и народа, говоря:

Иерей: Благословите мя, отцы святии и братия, и простите ми, грешному, елика согреших в сей день и во вся дни живота моего словом, делом, помышлением и всеми моими чувствы.

Сказав это, он земно кланяется народу. Все отвечают ему земным поклоном и говорят:

Люди: Бог простит тя, отче святый. Прости и нас, грешных, и благослови.

На это служащий священник (как правило, настоятель, а в обителях – наместник) отвечает:

Иерей: Благодатию Своею Бог да простит и помилует всех нас.

Затем настоятель берет напрестольный Крест. Все священнослужители в порядке старшинства прикладываются к иконам на аналое, подходят к настоятелю, целуют Крест и лобызаются с настоятелем и друг с другом в рамена (плечи), взаимно испрашивая прощения. За ними идут миряне, прикладываются ко Кресту, целуют иконы, которые обычно держат священнослужители, и испрашивают прощения у причта и друг у друга. Во время чина прощения принято петь: «Покаяния отверзи ми двери...», «На реках Вавилонских...» и другие.