Неделя 5-я Великого поста. Память прп. Марии Египетской. Часы и Литургия

ТРЕТИЙ ЧАС

Иерей: Благословен Бог наш всегда, ныне и присно, и во веки веков.

Чтец: Аминь.

Слава Тебе, Боже наш, слава Тебе.

Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Трисвятое по Отче наш.

Господи, помилуй. (12 раз)

Слава Отцу и Сыну и Святому Духу, и ныне и присно и во веки веков. Аминь.

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

Псалом 16

Услыши, Господи, правду мою, вонми молению моему, внуши молитву мою не во устнах льстивых. От лица Твоего судьба моя изыдет, очи мои да видита правоты. Искусил eси сердце мое, посетил eси нощию, искусил мя eси, и не обретеся во мне неправда. Яко да не возглаголют уста моя дел человеческих, за словеса устен Твоих аз сохраних пути жестоки. Соверши стопы моя во стезях Твоих, да не подвижутся стопы моя. Аз воззвах, яко услышал мя eси, Боже, приклони ухо Твое мне и услыши глаголы моя. Удиви милости Твоя, спасаяй уповающыя на Тя от противящихся деснице Твоей. Сохрани мя, Господи, яко зеницу ока, в крове крилу Твоею покрыеши мя. От лица нечестивых острастших мя, врази мои душу мою одержаша. Тук свой затвориша, уста их глаголаша гордыню. Изгонящии мя ныне обыдоша мя, очи свои возложиша уклонити на землю. Объяша мя яко лев готов на лов и яко скимен обитаяй в тайных. Воскресни, Господи, предвари я и запни им, избави душу мою от нечестиваго, oружие Твое от враг руки Твоея. Господи, от малых от земли, раздели я в животе их, и сокровенных Твоих исполнися чрево их, насытишася сынов, и оставиша останки младенцeм своим. Аз же правдою явлюся лицу Твоему, насыщуся, внегда явити ми ся славе Твоей.

Псалом 24

К Тебе, Господи, воздвигох душу мою, Боже мой, на Тя уповах, да не постыжуся во век, ниже да посмеют ми ся врази мои, ибо вси терпящии Тя не постыдятся. Да постыдятся беззаконнующии вотще. Пути Твоя, Господи, скажи ми, и стезям Твоим научи мя. Настави мя на истину Твою, и научи мя, яко Ты еси Бог Спас мой, и Тебе терпех весь день. Помяни щедроты Твоя, Господи, и милости Твоя, яко от века суть. Грех юности моея, и неведения моего не помяни, по милости Твоей помяни мя Ты, ради благости Твоея, Господи. Благ и прав Господь, сего ради законоположит согрешающым на пути. Наставит кроткия на суд, научит кроткия путем Своим. Вси путие Господни милость и истина, взыскающым завета Его, и свидения Его. Ради имене Твоего, Господи, и очисти грех мой, мног бо есть. Кто есть человек бояйся Господа? Законоположит eму на пути, eгоже изволи. Душа eго во благих водворится, и семя eго наследит землю. Держава Господь боящихся Его, и завет Его явит им. Очи мои выну ко Господу, яко Той исторгнет от сети нозе мои. Призри на мя и помилуй мя, яко единород и нищ есмь аз. Скорби сердца моего умножишася, от нужд моих изведи мя. Виждь смирение мое, и труд мой, и остави вся грехи моя. Виждь враги моя, яко умножишася, и ненавидением неправедным возненавидеша мя. Сохрани душу мою, и избави мя, да не постыжуся, яко уповах на Тя. Незлобивии и правии прилепляхуся мне, яко потерпех Тя, Господи. Избави, Боже, Израиля от всех скорбей eго.

Псалом 50

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе Единому согреших и лукавое пред Тобою сотворих, яко да оправдишися во словесех Твоих, и победиши внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на oлтарь Твой тельцы.

Слава Отцу и Сыну и Святому Духу и ныне и присно и во веки веков. Аминь.

Аллилуиа, аллилуиа, аллилуиа, слава Тебе Боже. (трижды)

Господи, помилуй. (трижды)

Тропарь воскресный, глас 4:

Светлую Воскресения проповедь/ от Ангела уведевша Господни ученицы/ и прадеднее осуждение отвергша,/ апостолом хвалящася глаголаху:/ испровержеся смерть,/ воскресе Христос Бог,// даруяй мирови велию милость.

Слава Отцу и Сыну и Святому Духу.

Тропраь Триоди (прп. Марии Еипетской), глас 8:

В тебе, мати, известно спасеся еже по образу,/ приимши бо крест, последовала еси Христу,/ и деющи учила еси презирати убо плоть, преходит бо,/ прилежати же о души, вещи безсмертней.// Темже и со Ангелы срадуется, преподобная Марие, дух твой.

И ныне и присно и во веки веков. Аминь.

Богородице, Ты еси лоза истинная,/ возрастившая нам Плод живота,/ Тебе молимся: / молися, Владычице, со святыми апостолы// помиловати души наша.

Господь Бог благословен,/ благословен Господь день дне,/ поспешит нам Бог спасений наших,// Бог наш, Бог спасати.

Трисвятое по Отче наш.

Кондак воскресный, глaс 4

Спас и Избавитель мой/ из гроба, яко Бог, воскреси от уз земнородныя,/ и врата адова сокруши,/ и яко Владыка// воскресе тридневен.

Господи, помилуй. (40 раз)

Иже на всякое время и на всякий час, на Небеси и на земли, покланяемый и славимый, Христе Боже, Долготерпеливе, Многомилостиве, Многоблагоутробне, Иже праведныя любяй и грешныя милуяй, Иже вся зовый ко спасению обещания ради будущих благ. Сам, Господи, приими и наша в час сей молитвы и исправи живот наш к заповедем Твоим, души наша освяти, телеса очисти, помышления исправи, мысли очисти и избави нас от всякия скорби, зол и болезней, огради нас святыми Твоими Ангелы, да ополчением их соблюдаеми и наставляеми, достигнем в соединение веры и в разум неприступныя Твоея славы, яко благословен еси во веки веков, аминь.

Господи помилуй. (трижды) 

Слава Отцу и Сыну и Святому Духу и ныне и присно и во веки веков. Аминь.

Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.

Именем Господним, святейший владыко, благослови.

Иерей: Молитвами святых отец наших, Господи Иисусе Христе, Боже наш, помилуй нас.

Чтец: Аминь.

Владыко Боже Отче Вседержителю, Господи Сыне Единородный Иисусе Христе, и Святый Душе, Едино Божество, Едина Сила, помилуй мя, грешнаго, и имиже веси судьбами, спаси мя, недостойнаго раба Твоего, яко благословен еси во веки веков, аминь.

ШЕСТОЙ ЧАС

Чтец: Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

Псалом 53

Боже, во имя Твое спаси мя, и в силе Твоей суди ми. Боже, услыши молитву мою, внуши глаголы уст моих. Яко чуждии восташа на мя и крепцыи взыскаша душу мою, и не предложиша Бога пред собою. Се бо Бог помогает ми, и Господь Заступник души моей. Отвратит злая врагом моим, истиною Твоею потреби их. Волею пожру Тебе, исповемся имени Твоему, Господи, яко благо, яко от всякия печали избавил мя еси, и на враги моя воззре око мое.

Псалом 54

Внуши, Боже, молитву мою и не презри моления моего. Вонми ми и услыши мя: возскорбех печалию моею и смятохся. От гласа вражия и от стужения грешнича, яко уклониша на мя беззаконие и во гневе враждоваху ми. Сердце мое смятеся во мне и боязнь смерти нападе на мя. Страх и трепет прииде на мя и покры мя тьма. И рех: кто даст ми криле, яко голубине, и полещу, и почию? Се удалихся бегая и водворихся в пустыни. Чаях Бога, спасающаго мя от малодушия и от бури. Потопи, Господи, и раздели языки их: яко видех беззаконие и пререкание во граде. Днем и нощию обыдет и по стенам eго. Беззаконие и труд посреде eго и неправда. И не оскуде от стогн eго лихва и лесть. Яко аще бы враг поносил ми, претерпел бых убо, и аще бы ненавидяй мя на мя велеречевал, укрыл бых ся от него. Ты же, человече равнодушне, владыко мой и знаемый мой, иже купно наслаждался еси со мною брашен, в дому Божии ходихом единомышлением. Да приидет же смерть на ня, и да снидут во ад живи, яко лукавство в жилищах их, посреде их. Аз к Богу воззвах, и Господь услыша мя. Вечер и заутра, и полудне повем, и возвещу, и услышит глас мой. Избавит миром душу мою от приближающихся мне, яко во мнозе бяху со мною. Услышит Бог и смирит я, Сый прежде век. Несть бо им изменения, яко не убояшася Бога. Простре руку свою на воздаяние, оскверниша завет Его. Разделишася от гнева лица Его, и приближишася сердца их, умякнуша словеса их паче елеа, и та суть стрелы. Возверзи на Господа печаль твою, и Той тя препитает, не даст в век молвы праведнику. Ты же, Боже, низведеши их во студенец истления, мужие кровей и льсти не преполовят дней своих. Аз же, Господи, уповаю на Тя.

Псалом 90

Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится, обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши, и попереши льва и змия. Яко на Мя упова и избавлю и, покрыю и, яко позна имя Мое. Воззовет ко Мне и услышу eго, с ним есмь в скорби, изму eго и прославлю eго, долготою дний исполню eго и явлю eму спасение Мое.

Слава Отцу и Сыну и Святому Духу и ныне и присно и во веки веков. Аминь.

Аллилуиа, аллилуиа, аллилуиа, слава Тебе Боже. (трижды)

Господи, помилуй. (трижды)

Тропарь воскресный, глас 4:

Светлую Воскресения проповедь/ от Ангела уведевша Господни ученицы/ и прадеднее осуждение отвергша,/ апостолом хвалящася глаголаху:/ испровержеся смерть,/ воскресе Христос Бог,// даруяй мирови велию милость.

Слава Отцу и Сыну и Святому Духу.

Тропраь Триоди (прп. Марии Еипетской), глас 8:

В тебе, мати, известно спасеся еже по образу,/ приимши бо крест, последовала еси Христу,/ и деющи учила еси презирати убо плоть, преходит бо,/ прилежати же о души, вещи безсмертней.// Темже и со Ангелы срадуется, преподобная Марие, дух твой.

И ныне и присно и во веки веков. Аминь.

Яко не имамы дерзновения за премногия грехи наша,/ Ты иже от Тебе Рождшагося моли, Богородице Дево,/ много бо может моление Матернее ко благосердию Владыки./ Не презри грешных мольбы, Всечистая,/ яко милостив есть и спасти могий,// Иже и страдати о нас изволивый.

Скоро да предварят ны щедроты Твоя, Господи,/ яко обнищахом зело;/ помози нам, Боже, Спасе наш,/ славы ради Имене Твоего, Господи, избави нас// и очисти грехи наша, Имене ради Твоего.

Трисвятое по Отче наш.

Кондак Триоди, глaс 3

Блудами первее преисполнена всяческими,/ Христова невеста днесь покаянием явися,/ Ангельское жительство подражающи,/ демоны Креста оружием погубляет./ Сего ради Царствия невеста явилася еси,/ Марие преславная.

Господи, помилуй. (40 раз)

Иже на всякое время и на всякий час, на Небеси и на земли, покланяемый и славимый, Христе Боже, Долготерпеливе, Многомилостиве, Многоблагоутробне, Иже праведныя любяй и грешныя милуяй, Иже вся зовый ко спасению обещания ради будущих благ. Сам, Господи, приими и наша в час сей молитвы и исправи живот наш к заповедем Твоим, души наша освяти, телеса очисти, помышления исправи, мысли очисти и избави нас от всякия скорби, зол и болезней, огради нас святыми Твоими Ангелы, да ополчением их соблюдаеми и наставляеми, достигнем в соединение веры и в разум неприступныя Твоея славы, яко благословен еси во веки веков, аминь.

Господи помилуй. (трижды)

Слава Отцу и Сыну и Святому Духу и ныне и присно и во веки веков. Аминь.

Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.

Именем Господним, святейший владыко, благослови.

Иерей: Молитвами святых отец наших, Господи Иисусе Христе, Боже наш, помилуй нас.

Чтец: Аминь.

Боже и Господи сил и всея твари Содетелю, Иже за милосердие безприкладныя милости Твоея Единороднаго Сына Твоего, Господа нашего Иисуса Христа, низпославый на спасение рода нашего, и честным Его Крестом рукописание грех наших растерзавый, и победивый тем начала и власти тьмы. Сам, Владыко Человеколюбче, приими и нас, грешных, благодарственныя сия и молебныя молитвы и избави нас от всякаго всегубительнаго и мрачнаго прегрешения и всех озлобити нас ищущих видимых и невидимых враг. Пригвозди страху Твоему плоти наша и не уклони сердец наших в словеса или помышления лукавствия, но любовию Твоею уязви души наша, да, к Тебе всегда взирающе и еже от Тебе светом наставляеми, Тебе, неприступнаго и присносущнаго зряще Света, непрестанное Тебе исповедание и благодарение возсылаем, Безначальному Отцу со Единородным Твоим Сыном и Всесвятым, и Благим, и Животворящим Твоим Духом ныне, и присно, и во веки веков, аминь.

БОЖЕСТВЕННАЯ ЛИТУРГИЯ

(свт. Василия Великого)

Диакон: Благослови, владыко.

Иерей: Благословенно ЦарствоОтца и Сына и Святаго Духа, ныне и присно и во веки веков.

Хор: Аминь.

Диакон: Миром Господу помолимся... (великая ектения)

Хор: Господи помилуй.

Диакон: Пресвятую, пречистую, преблагословенную, славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Хор: Тебе, Господи.

Молитва первого антифона

Иерей: Господи Боже наш, Егоже держава несказанна и слава непостижима, Егоже милость безмерна и человеколюбие неизреченно. Сам, Владыко, по благоутробию Твоему призри на ны и на святый храм сей, и сотвори с нами и молящимися с нами, богатыя милости Твоя и щедроты Твоя.

Иерей: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.

Хор: Аминь.

Первый антифон, псалом 102

Хор: Благослови, душе моя, Господа,/ благословен еси Господи./

Благослови, душе моя, Господа,/ и вся внутренняя моя/ имя святое Его./ Благослови, душе моя, Господа,/ и не забывай всех воздаяний Его,/ очищающаго вся беззакония твоя,/ исцеляющаго вся недуги твоя,/ избавляющаго от истления живот твой,/ венчающаго тя милостию и щедротами,/ исполняющаго во благих желание твое: / обновится яко орля юность твоя./ Щедр и Милостив Господь,/ Долготерпелив и Многомилостив.

Благослови, душе моя, Господа,/ и вся внутренняя моя/ имя святое Его.// Благословен еси, Господи.

Диакон: Паки и паки миром Господу помолимся.

Хор: Господи, помилуй. (на оба прошения)

Заступи, спаси, помилуй и сохрани нас, Боже, Твоею благодатию.

Диакон: Пресвятую, пречистую, преблагословенную, славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Хор: Тебе, Господи.

Молитва второго антифона

Иерей: Господи Боже наш, спаси люди Твоя и благослови достояние Твое, исполнение Церкве Твоея сохрани, освяти любящия благолепие дому Твоего. Ты тех воспрослави Божественною Твоею силою и не остави нас, уповающих на Тя.

Иерей: Яко Твоя держава и Твое есть Царство и сила, и слава, Отца, и Сына, и Святаго Духа, ныне и присно, и во веки веков.

Хор: Аминь.

Второй антифон, псалом 145

Хор: Хвали, душе моя, Господа./ Восхвалю Господа в животе моем,/ пою Богу моему, дондеже есмь./ Не надейтеся на князи, на сыны человеческия,/ в нихже несть спасения./ Изыдет дух eго/ и возвратится в землю свою./ В той день погибнут вся помышления eго./ Блажен, eмуже Бог Иаковль Помощник его,/ упование eго на Господа Бога своего,/ сотворшаго небо и землю,/ море и вся, яже в них,/ хранящаго истину в век,/ творящаго суд обидимым,/ дающаго пищу алчущим./ Господь решит окованныя./ Господь умудряет слепцы./ Господь возводит низверженныя./ Господь любит праведники./ Господь хранит пришельцы,/ сира и вдову приимет/ и путь грешных погубит./ Воцарится Господь во век,// Бог твой, Сионе, в род и род.

Единородный Сыне:

Слава Отцу и Сыну и Святому Духу и ныне и присно и во веки веков. Аминь.

Единородный Сыне и Слове Божий, Безсмертен Сый/ и изволивый спасения нашего ради/ воплотитися от Святыя Богородицы и Приснодевы Марии,/ непреложно вочеловечивыйся,/ распныйся же, Христе Боже, смертию смерть поправый,/ Един Сый Святыя Троицы,// спрославляемый Отцу и Святому Духу, спаси нас.

Диакон: Паки и паки миром Господу помолимся.

Хор: Господи, помилуй. (на оба прошения)

Заступи, спаси, помилуй и сохрани нас, Боже, Твоею благодатию.

Диакон: Пресвятую, пречистую, преблагословенную, славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Хор: Тебе, Господи.

Молитва третьего антифона

Иерей: Иже общия сия и согласныя даровавый нам молитвы, иже и двема или трем согласующимся о имени Твоем прошения подати обещавый, Сам и ныне раб Твоих прошения к полезному исполни, подая нам и в настоящем веце познание Твоея истины, и в будущем живот вечный даруя.

Иерей: Яко благ и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Хор: Аминь.

Открываются Царские врата.

Третий антифон. Блаженны

Хор: Во Царствии Твоем помяни нас, Господи,/ егда приидеши, во Царствии Твоем.

Блажени нищии духом,/ яко тех есть Царство Небесное.

Блажени плачущии,/ яко тии утешатся.

Блажени кротции,/ яко тии наследят землю.

Блажени алчущии и жаждущии правды,/ яко тии насытятся.

Блажени милостивии,/ яко тии помиловани будут.

Блажени чистии сердцем,/ яко тии Бога узрят.

Блажени миротворцы,/ яко тии сынове Божии нарекутся.

Блажени изгнани правды ради,/ яко тех есть Царство Небесное.

Блажени есте, егда поносят вам,/ и изженут, и рекут всяк зол глагол на вы, лжуще Мене ради.

Радуйтеся и веселитеся,/ яко мзда ваша многа на Небесех.

Малый вход (с Евангелием)

Диакон: Господу помолимся.

Молитва входа

Иерей: Владыко Господи Боже наш, уставивый на небесех чины и воинства Ангел и Архангел в служение Твоея славы, сотвори со входом нашим входу святых Ангелов быти, сослужащих нам, и сославословящих Твою благость. Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.

Диакон: Благослови, владыко, святый вход.

Иерей (благословляя): Благословен вход святых Твоих, всегда, ныне и присно, и во веки веков.

Диакон: Премудрость, прости.

Хор: Приидите, поклонимся и припадем ко Христу. Спаси ны, Сыне Божий, Воскресый из мертвых, поющия Ти: аллилуиа.

Тропари

Воскресный, глас 4:

Светлую Воскресения проповедь/ от Ангела уведевша Господни ученицы/ и прадеднее осуждение отвергша,/ апостолом хвалящася глаголаху:/ испровержеся смерть,/ воскресе Христос Бог,// даруяй мирови велию милость.

Храма, глас той же:

Познай свою братию, российский Иосифе,/ не в Египте, но на Небеси царствующий,/ благоверный княже Александре,/ и приими моления их,/ умножая жита людем плодоносием земли твоея,/ грады владычествия твоего ограждая молением// и православным христианом на сопротивныя споборствуя.

Прп. Марии Египетской, глас 8:

В тебе, мати, известно спасеся еже по образу,/ приимши бо крест, последовала еси Христу,/ и деющи учила еси презирати убо плоть, преходит бо,/ прилежати же о души, вещи безсмертней.// Темже и со Ангелы срадуется, преподобная Марие, дух твой.

Слава Отцу и Сыну и Святому Духу.

Кондак Триоди, глас 3:

Блудами первее преисполнена всяческими,/ Христова невеста днесь покаянием явися,/ Ангельское жительство подражающи,/ демоны Креста оружием погубляет./ Сего ради Царствия невеста явилася еси,/ Марие преславная.

И ныне и присно и во веки веков. Аминь.

Конадк Богородицы, глас 6:

Предстательство христиан непостыдное,/ ходатайство ко Творцу непреложное,/ не презри грешных молений гласы,/ но предвари, яко Благая,/ на помощь нас, верно зовущих Ти:/ ускори на молитву и потщися на умоление,// предстательствующи присно, Богородице, чтущих Тя.

Священник же глаголет молитву сию:

Молитва перед пением Трисвятаго

Иерей: Боже Святый, иже во святых почиваяй, иже трисвятым гласом от Серафимов воспеваемый и от Херувимов славословимый, и от всякия Небесныя Силы покланяемый, иже от небытия во еже быти приведый всяческая, создавый человека по образу Твоему и по подобию, и всяким Твоим дарованием украсивый, даяй просящему премудрость и разум, и не презираяй согрешающаго, но полагаяй на спасение покаяние, сподобивый нас, смиренных и недостойных раб Твоих, и в час сей стати пред славою святаго Твоего жертвенника, и должное Тебе поклонение и славословие приносити. Сам, Владыко, приими и от уст нас, грешных, Трисвятую песнь, и посети ны благостию Твоею, прости нам всякое согрешение вольное же и невольное, освяти наша души и телеса, и даждь нам в преподобии служити Тебе вся дни живота нашего, молитвами святыя Богородицы, и всех святых, от века Тебе благоугодивших.

Диакон: Господу помолимся.

Хор: Господи, помилуй.

Иерей: Яко Свят еси, Боже наш, и Тебе славу возсылаем, Отцу и Сыну и Святому Духу, ныне и присно.

Диакон: Господи, спаси благочестивыя и услыши ны.

Хор: Господи, спаси благочестивыя и услыши ны.

Диакон: И во веки веков.

Хор: Аминь.

Трисвятое

Хор: Святый Боже, Святый Крепкий, Святый Безсмертный, помилуй нас. (трижды)

Слава Отцу и Сыну и Святому Духу и ныне и присно и во веки веков. Аминь.

Святый Безсмертный, помилуй нас.

Святый Боже, Святый Крепкий, Святый Безсмертный, помилуй нас.

Священник же и диакон глаголют:

Диакон: Повели, владыко.

Иерей: Благословен Грядый во имя Господне.

Диакон: Благослови, владыко, Горний престол.

Иерей: Благословен еси на престоле славы Царствия Твоего, Седяй на Херувимех, всегда, ныне и присно, и во веки веков.

Диакон: Вонмем.

Иерей: Мир всем.

Чтец: И духови твоему.

Диакон: Премудрость.

Чтец: Прокимен, глас четвертый:

Яко возвеличишася дела Твоя, Господи, вся премудростию сотворил еси.

Хор: Яко возвеличишася дела Твоя, Господи, вся премудростию сотворил еси. (на оба стиха)

Благослови душе моя, Господа, Господи Боже мой, возвеличился еси зело.

Чтец: Глас той же: Дивен Бог во святых Своих, Бог Израилев.

Хор: Дивен Бог во святых Своих, Бог Израилев.

Диакон: Премудрость.

Чтец: Ко Евреем послания святаго Апостола Павла чтение.

Диакон: Вонмем.

Чтец: Братие, Христос пришед Архиерей грядущих благ, большею и совершеннейшею скиниею, нерукотворенною, сиречь, не сея твари, ни кровию козлею, ни тельчею, но Своею Кровию, вниде eдиною во святая, вечное искупление обретый. Аще бо кровь козлия и тельчая, и пепел юнчий кропящий осквернéныя, освящает к плотней чистоте, кольми паче Кровь Христова, Иже Духом Святым Себе принесе непорочна Богу, очистит совесть нашу от мертвых дел, во éже служити нам Богу живу и истинну.

Братие, прежде пришествия веры, под законом стрегоми бехом, затворени в хотящую веру открытися. Темже закон пестун нам бысть во Христа, да от веры оправдимся. Пришедши же вере, уже не под пестуном eсмы. Вси бо вы сынове Божии eсте верою о Христе Иисусе: eлицы бо во Христа крестистеся, во Христа облекостеся. Несть Иудей, ни éллин; несть раб, ни свободь; несть мужеский пол, ни женский; вси бо вы eдино eсте о Христе Иисусе. Аще ли вы Христовы, убо Авраамле семя eсте, и по обетованию наследницы.

Перевод: Братья, Христос, придя как Первосвященник будущих благ, чрез большую и совершеннейшую скинию, нерукотворенную, то есть не этого творения, и не чрез кровь козлов и тельцов, но чрез собственную кровь, – вошел раз навсегда во святилище, приобретя вечное искупление. Ибо, если кровь козлов и быков и пепел телицы окроплением оскверненных освящает к чистоте плоти, – тем более кровь Христа, Который Духом вечным принес Себя непорочного Богу, очистит совесть нашу от мёртвых дел для служения Богу Живому и Истинному.

Братья, прежде, чем придти вере, мы были заключены под стражей Закона в ожидании будущего откровения веры, так что Закон стал для нас детоводителем ко Христу, чтобы нам быть оправданными верою; а когда пришла вера, мы уже не под властью детоводителя. Ибо все вы чрез веру – сыны Божии во Христе Иисусе. Ибо вы, которые были крещены во Христа, все вы облеклись во Христа. Нет Иудея, ни Эллина, нет раба, ни свободного, нет мужчины и женщины; ибо все вы – одно во Христе Иисусе. Если же вы Христовы, значит вы – семя Авраамово, по обещанию наследники.

Иерей: Мир ти.

Чтец: И духови твоему.

Диакон: Премудрость.

Чтец: Аллилуия, аллилуия, аллилуия, глас четвертый.

Хор: Аллилуия, аллилуия, аллилуия. (на каждый стих)

Наляцы, и успевай, и царствуй истины ради, и кротости, и правды.

Терпя, потерпех Господа, и внят ми, и услыша молитву мою.

Молитва перед чтением Евангелия

Иерей: Возсияй в сердцах наших, человеколюбче Владыко, Твоего Богоразумия нетленный свет, и мысленныя наши отверзи очи, во Евангельских Твоих проповеданий разумение. Вложи в нас и страх блаженных Твоих заповедей, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще. Ты бо еси просвещение душ и телес наших, Христе Боже, и Тебе славу возсылаем, со безначальным Твоим Отцем, и пресвятым и благим и животворящим Твоим Духом, ныне и присно, и во веки веков. Аминь.

Диакон: Благослови, владыко, благовестителя святаго апостола и евангелиста Марка.

Иерей: Бог, молитвами святаго, славнаго, всехвальнаго апостола и евангелиста Марка, да даст тебе глагол благовествующему силою многою, во исполнение Евангелия возлюбленнаго Сына Своего, Господа нашего Иисуса Христа.

Диакон: Аминь. Премудрость, прости, услышим святаго Евангелия.

Иерей: Мир всем.

Хор: И духови твоему.

Диакон: От Марка святаго Евангелия чтение.

Хор: Слава Тебе, Господи, слава Тебе.

Диакон: Вонмем.

Во время оно, поят Иисус oбанадесять, начат им глаголати, яже хотяху Eму быти, яко, се, восходим во Иерусалим, и Сын Человеческий предан будет архиереом и книжником, и осудят Eго на смерть, и предадят Eго языком. И поругаются Eму, и уязвят Eго, и оплюют Eго, и убиют Eго, и в третий день воскреснет. И пред Ним приидоста Иаков и Иоанн, сына Зеведеeва, глаголюща: Учителю, хощева, да éже аще просива, сотвориши нама. Oн же рече има: что хощета, да сотворю вама? Она же реста Eму: даждь нам, да eдин одесную Тебé, и eдин ошуюю Тебé сядева во славе Твоей. Иисус же рече има: не вестася, чесо просита. Можета ли пити чашу, юже Аз пию, и крещением, имже Аз крещаюся, креститися? Она же реста Eму: можева. Иисус же рече има: чашу убо, юже Аз пию, испиета, и крещением, имже Аз крещаюся, креститася. А éже сести одесную Менé и ошуюю, несть Мне дати, но имже уготовано eсть. И слышавше десять, начаша негодовати о Иакове и Иоанне. Иисус же призвав их, глагола им: весте, яко мнящиися владети языки, соодолевают им, и велицыи их обладают ими. Не тако же будет в вас, но иже аще хощет в вас вящший быти, да будет вам слуга. И иже аще хощет в вас быти старей, да будет всем раб. Ибо Сын Человечь не прииде, да послужат Eму, но да послужит, и дати душу Свою избавление за многи.

Во время оно, моляше Иисуса некий от фарисéй, да бы ял с ним: и вшед в дом фарисеов, возлеже. И се жена во граде, яже бе грешница, и уведевши, яко возлежит во храмине фарисеове, принесши алавастр мира. И ставши при ногу Eго созади, плачущися, начат умывати нозе Eго слезами, и власы главы своея отираше, и облобызаше нозе Eго, и мазаше миром. Видев же фарисей возвавый Eго, рече в себе, глаголя: Сей аще бы был пророк, ведел бы кто и какова жена прикасается Eму, яко грешница eсть. И отвещав Иисус рече к нему: Симоне, имам ти нечто рещи. Oн же рече: Учителю, рцы. Иисус же рече: два должника беста заимодавцу некоему, eдин бе должен пятиюсот динарий, другий же пятиюдесят. Не имущема же има воздати, oбема отда. Который убо eю, рцы, паче возлюбит eго? Отвещав же Симон рече: мню, яко eмуже вящше отда. Oн же рече eму: право судил eси. И обращься к жене, Симонови рече: видиши ли сию жену? Внидох в дом твой, воды на нозе Мои не даде, сия же слезами облия Ми нозе, и власы главы своея отре. Лобзания Ми не даде, сия же, отнелиже внидох, не преста облобызающи Ми нозе. Маслом главы Моея не помаза: сия же миром помаза Ми нозе. Егоже ради, глаголю ти: отпущаются греси eя мнози, яко возлюби много, а eмуже мало оставляется, меньше любит. Рече же eй: отпущаются тебе греси. И начаша возлежащии с Ним глаголати в себе: кто Сей eсть, иже и грехи отпущает? Рече же к жене: вера твоя спасе тя, иди в мире.

Перевод: В то время, отозвав Двенадцать, Иисус начал говорить им о том, что предстоит Ему: вот, мы восходим в Иерусалим, и Сын Человеческий предан будет первосвященникам и книжникам, и приговорят Его к смерти, и предадут Его язычникам; и надругаются над Ним, и оплюют Его, и будут бичевать Его, и убьют, и через три дня Он воскреснет. И подходят к Нему Иаков и Иоанн, два сына Зеведеева, и говорят Ему: Учитель, хотим, чтобы Ты сделал нам то, о чем мы Тебя попросим. Он сказал им: что вы хотите, чтобы Я сделал вам? Они же сказали Ему: дай нам сесть одному по правую Твою сторону, а другому по левую, во славе Твоей. Иисус же сказал им: не знаете, чего просите; можете ли пить чашу, которую Я пью, или крещением, которым Я крещусь, креститься? Они сказали Ему: можем. Иисус же сказал им: чашу, которую Я пью, будете пить, и крещением, которым Я крещусь, будете креститься; а сесть по правую Мою сторону или по левую – не Я даю, но кому уготовано. И услышав, десять начали негодовать на Иакова и Иоанна. И призвав их, Иисус говорит им: вы знаете, что те, которые считаются начальниками над народами, господствуют над ними, и вельможи их показывают над ними свою власть; но не так между вами. Но, кто хочет стать великим между вами, пусть будет вам слугой; и кто хочет между вами быть первым, пусть всем будет рабом. Ибо и Сын Человеческий не для того пришел, чтобы Ему послужили, но чтобы послужить и дать душу Свою как выкуп за многих.

В то время просил Иисуса некто из фарисеев вкусить с ним. И войдя в дом фарисея, Он возлег. И вот, женщина, которая была известна в городе, как грешница, узнав, что Он возлежит в доме фарисея, принесла алебастровый сосуд с миром и, став сзади у ног Его, начала, плача, обливать ноги Его слезами и волосами головы своей отирала, и целовала ноги Его, и мазала миром. Увидев это, фарисей, пригласивший Его, сказал самому себе: Этот, если бы Он был пророк, знал бы, кто и какая женщина прикасается к Нему, потому что она грешница. И Иисус ему ответил: Симон, Я имею нечто сказать тебе. Он говорит: скажи, Учитель. У некоего заимодавца было два должника: один должен был пятьсот динариев, а другой пятьдесят. Так как им нечем было заплатить, он простил обоим. Кто же из них больше возлюбит его? Симон ответил: полагаю, что тот, кому он больше простил. Он же сказал ему: ты правильно рассудил. И обратившись к женщине, сказал Симону: видишь ли ты эту женщину? Я вошел к тебе в дом: ты воды Мне на ноги не дал, она же слезами облила Мне ноги и отерла волосами своими; ты целования Мне не дал, она же, с тех пор, как Я вошел, не переставала целовать Мне ноги; ты елеем головы Моей не помазал, она же миром помазала ноги Мои. Поэтому говорю тебе: прощены грехи ее многие за то, что она возлюбила много. А кому мало прощается, тот мало любит. И Он сказал ей: прощены твои грехи. И начали возлежащие с ним говорить самим себе: кто это, что и грехи прощает? Он же сказал женщине: вера твоя спасла тебя, иди с миром.

Хор: Слава Тебе, Господи, слава Тебе.

Екетнии

Диакон: Рцем вси от всея души, и от всего помышления нашего рцем... (ектения сугубая)

Молитва усердного моления

Иерей: Господи Боже наш, прилежное сие моление приими от Твоих раб, и помилуй нас по множеству милости Твоея, и щедроты Твоя низпосли на ны и на вся люди Твоя, чающыя от Тебе богатыя милости.

Иерей: Яко милостив и человеколюбец Бог еси, и Тебе славу возсылаем, Отцу и Сыну и Святому Духу, ныне и присно, и во веки веков.

Хор: Аминь.

Помилуй нас, Боже, по велицей милости Твоей, молим Ти ся, услыши и помилуй... (заупокойная ектения)

Молитва об усопших

Иерей: Боже духов, и всякия плоти, смерть поправый и диавола упразднивый, и живот мiру Твоему даровавый: Сам, Господи, покой души усопших раб Твоих, (имярек), в месте светле, в месте злачне, в месте покойне, отнюдуже отбеже болезнь, печаль и воздыхание. Всякое согрешение, содеянное ими словом, или делом, или помышлением, яко благий человеколюбец Бог, прости. Яко несть человек, иже жив будет и не согрешит. Ты бо Един кроме греха, правда Твоя правда во веки, и слово Твое истина.

Иерей: Яко Ты еси воскресение и живот и покой усопших раб Твоих, (имярек), Христе Боже наш, и Тебе славу возсылаем, со безначальным Твоим Отцем, и пресвятым и благим и животворящим Твоим Духом, ныне и присно, и во веки веков.

Хор: Аминь.

Закрываются Царские врата.

Помолитеся, оглашеннии, Господеви... (ектения об оглашенных)

Молитва об оглашенных

Иерей: Господи Боже наш, иже на небесех живый и призираяй на вся дела Твоя, призри на рабы Твоя оглашенныя, приклоньшыя своя выя пред Тобою и даждь им легкий ярем, сотвори их уды честны святыя Твоея Церкве и сподоби их бани пакибытия, оставления грехов и одежди нетления, в познание Тебе, истиннаго Бога нашего.

Иерей: Да и тии с нами славят пречестное и великолепое имя Твое, Отца, и Сына, и Святаго Духа, ныне и присно, и во веки веков.

Хор: Аминь.

Елицы оглашеннии, изыдите, оглашеннии, изыдите, елицы оглашеннии, изыдите, да никто от оглашенных, елицы вернии, паки и паки миром Господу помолимся... (ектения верных первая)

Диакон: Премудрость.

Молитва верных первая

Иерей: Ты, Господи, показал еси нам великое сие спасения таинство. Ты сподобил еси нас, смиренных и недостойных раб Твоих, быти служителем святаго Твоего жертвенника. Ты удовли нас, силою святаго Твоего Духа, в службу сию, да неосужденно ставше пред святою славою Твоею, принесем Ти жертву хваления. Ты бо еси действуяй вся во всех. Даждь, Господи, и о наших гресех, и о людских неведениих, приятней быти жертве нашей, и благоприятней пред Тобою.

Иерей: Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.

Хор: Аминь.

Паки и паки, миром Господу помолимся... (ектения верных вторая)

Молитва верных вторая

Иерей: Боже, посетивый в милости и щедротах смирение наше, поставивый нас смиренных и грешных и недостойных раб Твоих пред святою славою Твоею, служити святому жертвеннику Твоему. Ты укрепи нас силою Святаго Твоего Духа в службу сию, и даждь нам слово во отверзение уст наших, во еже призывати благодать Святаго Твоего Духа на хотящия предложитися Дары.

Диакон: Премудрость.

Иерей: Яко да под державою Твоею всегда храними, Тебе славу возсылаем, Отцу, и Сыну, и Святому Духу, ныне и присно, и во веки веков.

Хор: Аминь.

Открываются Царские врата.

Херувимская песнь

Хор: Иже Херувимы тайно образующе и животворящей Троице Трисвятую песнь припевающе, всякое ныне житейское отложим попечение.

Во время пения Херувимской песни диакон, взяв благословение от иерея, читая про себя 50-й псалом, кадит святой престол, жервенник, алтарь. Затем Царскими вратами выходит на солею, кадит иконостас; входит в алтарь, кадит иерея и предстоящих там; снова выходит на амвон и кадит молящихся. Священние же во время каждения тайно глаголет молитву:

Молитва херувимской песни

Иерей: Никтоже достоин от связавшихся плотскими похотьми и сластьми приходити, или приближитися, или служити Тебе, Царю Славы: еже бо служити Тебе, велико и страшно и самем Небесным Силам. Но обаче неизреченнаго ради и безмернаго Твоего человеколюбия, непреложно и неизменно был еси Человек, и Архиерей нам был еси: и служебныя сея и безкровныя жертвы священнодействие предал еси нам, яко Владыка всех. Ты бо един, Господи Боже наш, владычествуеши небесными и земными, иже на престоле Херувимсте носимый, иже Серафимов Господь, и Царь Израилев, иже Един свят, и во святых почиваяй. Тя убо молю, Единаго благаго и благопослушливаго: призри на мя, грешнаго и непотребнаго раба Твоего, и очисти мою душу и сердце от совести лукавыя, и удовли мя, силою святаго Твоего Духа, облечена благодатию священства, предстати святей Твоей сей трапезе, и священнодействовати Святое и Пречистое Твое Тело и Честную Кровь. К Тебе бо прихожду приклонь мою выю, и молю Ти ся, да не отвратиши лица Твоего от мене, ниже отринеши мене от отрок Твоих, но сподоби принесенным Тебе быти, мною грешным и недостойным рабом Твоим, даром сим. Ты бо еси приносяй и приносимый, и приемляй и раздаваемый, Христе Боже наш, и Тебе славу возсылаем, со безначальным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков. Аминь.

По окончании молитвы и каждения священник с диаконом, стоя перед святым престолом, трижды читают Херувимскую песнь, в конце каждый раз совершая поклон, и отходят к святому жертвеннику:

Иерей: Иже Херувимы тайно образующе и животворящей Троице Трисвятую песнь припевающе, всякое ныне житейское отложим попечение. (трижды)

Диакон: Яко да Царя всех подымем, ангельскими невидимо дориносима чинми. Аллилуиа, аллилуиа, аллилуиа. (трижды)

Иерей: Боже, очисти мя грешнаго.

Диакон: Возьми, владыко.

Иерей: Возмите руки ваша во святая и благословите Господа.

Великий вход

Диакон: Великаго господина и отца нашего Кирилла, Святейшаго Патриарха Московскаго и всея Руси, да помянет Господь Бог во Царствии Своем всегда, ныне и присно, и во веки веков.

Иерей: Преосвященныя митрополиты, архиепископы и епископы, и весь священнический и монашеский чин, и причет церковный, братию святаго храма сего, всех вас, православных христиан, да помянет Господь Бог во Царствии Своем, всегда, ныне и присно, и во веки веков.

Хор: Аминь. Яко да Царя всех подымем, ангельскими невидимо дориносима чинми. Аллилуиа, аллилуиа, аллилуиа.

Священник и диакон входят в алтарь.

Диакон: Да помянет Господь Бог священство твое во Царствии Своем, всегда, ныне и присно, и во веки веков.

Иерей: Да помянет Господь Бог священнодиаконство твое во Царствии Своем, всегда, ныне и присно, и во веки веков.

Иерей, поставляя дары на престол, глаголет сия тропари: Благообразный Иосиф, с древа снем Пречистое Тело Твое, плащаницею чистою обвив, и благоуханьми во гробе нове покрыв, положи.

Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом, вся исполняяй неописанный.

Яко живоносец, яко рая краснейший, воистинну и чертога всякаго царскаго показася светлейший, Христе, гроб Твой, источник нашего воскресения.

Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая, тогда возложат на олтарь Твой тельцы.

Иерей, обращаясь к диакоу: Помяни мя, брате и сослужителю.

Диакон: Да помянет Господь Бог священство твое во Царствии Своем. Помолися о мне, владыко святый.

Иерей: Дух Святый найдет на тя, и Сила Вышняго осенит тя.

Диакон: Тойже Дух содействует нам вся дни живота нашего. Помяни мя, владыко святый.

Иерей: Да помянет тя Господь Бог во Царствии Своем, всегда, ныне и присно, и во веки веков.

Диакон: Аминь.

Закрываются Царские врата. Диакон же, целовав десницу священника, исходит северными дверьми, и став на обычном месте, глаголет:

Исполним молитву нашу Господеви... (ектения просительная)

Молитва Приношения после поставления Божественных Даров на святом Престоле

Иерей: Господи Боже наш, создавый нас и введый в жизнь сию, показавый нам пути во спасение, даровавый нам Небесных Таин откровение. Ты бо еси положивый нас в службу сию, силою Духа Твоего Святаго. Благоволи убо, Господи, быти нам служителем новаго Твоего Завета, слугам святых Твоих Таинств. Приими нас, приближающихся святому Твоему жертвеннику, по множеству милости Твоея, да будем достойни приносити Тебе словесную сию и безкровную жертву о наших согрешениих и о людских невежествиих: юже прием во святый и пренебесный, и мысленный Твой жертвенник, в воню благоухания, возниспосли нам благодать Святаго Твоего Духа. Призри на ны, Боже, и виждь на службу сию нашу, и приими ю, якоже приял еси Авелевы дары, Ноевы жертвы, Авраамова всеплодия, Моисеова и Ааронова священства, Самуилова мирная. Якоже приял еси от святых Твоих Апостол истинную сию службу, сице и от рук нас, грешных, приими Дары сия в благости Твоей, Господи, яко да сподобльшеся служити без порока святому Твоему жертвеннику, обрящем мзду верных и мудрых строителей в день страшный воздаяния Твоего праведнаго.

Иерей: Щедротами Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно, и во веки веков.

Хор: Аминь.

Иерей: Мир всем.

Хор: И духови твоему.

Диакон: Возлюбим друг друга, да единомыслием исповемы.

Хор: Отца, и Сына, и Святаго Духа,/ Троицу единосущную/ и нераздельную.

ИерейВозлюблю Тя, Господи, крепосте моя, Господь утверждение мое и прибежище мое. (трижды)

Диакон: Двери, двери, премудростию вонмем.

Открываются Царские врата.

Символ веры

Люди: Верую во единаго Бога Отца Вседержителя, Творца небу и земли, видимым же всем и невидимым. И во единаго Господа Иисуса Христа, Сына Божия, Единороднаго, Иже от Отца рожденнаго прежде всех век. Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки. Во едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь.

Евхаристический канон

Диакон: Станем добре, станем со страхом, вонмем, святое возношение в мире приносити.

Хор: Милость мира,/ жертву хваления.

Иерей: Благодать Господа нашего Иисуса Христа, и любы Бога и Отца, и причастие Святаго Духа, буди со всеми вами.

Хор: И со духом твоим.

Иерей: Горе имеим сердца.

Хор: Имамы ко Господу.

Иерей: Благодарим Господа.

Хор: Достойно и праведно есть/ покланятися Отцу и Сыну, и Святому Духу,// Троице единосущней и нераздельней.

Иерей: Сый Владыко, Господи Боже Отче Вседержителю покланяемый! Достойно яко воистинну, и праведно, и лепо великолепию святыни Твоея, Тебе хвалити, Тебе пети, Тебе благословити, Тебе кланятися, Тебе благодарити, Тебе славити единаго воистинну сущаго Бога, и Тебе приносити сердцем сокрушенным и духом смирения словесную сию службу нашу, яко Ты еси даровавый нам познание Твоея истины. И кто доволен возглаголати силы Твоя, слышаны сотворити вся хвалы Твоя, или поведати вся чудеса Твоя во всяко время. Владыко всех, Господи небесе и земли, и всея твари, видимыя же и невидимыя, седяй на престоле славы и призираяй бездны, безначальне, невидиме, непостижиме, неописанне, неизменне, Отче Господа нашего Иисуса Христа, великаго Бога и Спасителя, упования нашего, иже есть образ Твоея благости: печать равнообразная, в себе показуя Тя, Отца, Слово живое, Бог истинный, превечная Премудрость, живот, освящение, сила, свет истинный, имже Дух Святый явися; Дух истины, сыноположения дарование, обручение будущаго наследия, начаток вечных благ, животворящая сила, источник освящения, от негоже вся тварь словесная же и умная укрепляема Тебе служит и Тебе присносущное возсылает славословие, яко всяческая работна Тебе. Тебе бо хвалят Ангели, Архангели, Престоли, Господьствия, Начала, Власти, Силы и многоочитии Херувими. Тебе предстоят окрест Серафими, шесть крил единому, и шесть крил единому; и двема убо покрывают лица своя, двема же ноги, и двема летающе, взывают един ко другому, непрестанными усты, немолчными славословеньми.

Иерей: Победную песнь поюще, вопиюще, взывающе и глаголюще.

Хор: Свят, свят, свят Господь Саваоф,/ исполнь небо и земля славы Твоея;/ осанна в вышних,/ благословен Грядый во имя Господне,/ осанна в вышних.

Иерей: С сими блаженными силами, Владыко человеколюбче, и мы, грешнии, вопием и глаголем: свят еси, яко воистинну, и пресвят, и несть меры великолепию святыни Твоея, и преподобен во всех делех Твоих, яко правдою и судом истинным вся навел еси на ны: создав бо человека, персть взем от земли, и образом Твоим, Боже, почет, положил еси в раи сладости, безсмертие жизни и наслаждение вечных благ, в соблюдении заповедей Твоих обещав ему, но преслушавша Тебе, истиннаго Бога, создавшаго его, и прелестию змиевою привлекшася, умерщвлена же своими прегрешеньми, изгнал еси его праведным Твоим судом, Боже, от рая в мiр сей, и отвратил еси в землю, от неяже взят бысть, устрояя ему еже от пакибытия спасение, в Самем Христе Твоем. Не бо отвратился еси создания Твоего в конец, еже сотворил еси, Блаже, ниже забыл еси дела рук Твоих, но посетил еси многообразне, ради милосердия милости Твоея. Пророки послал еси, сотворил еси силы святыми Твоими, в коемждо роде благоугодившими Тебе. Глаголал еси нам усты раб Твоих пророков, предвозвещая нам хотящее быти спасение. Закон дал еси в помощь, Ангелы поставил еси хранители. Егда же прииде исполнение времен, глаголал еси нам самем Сыном Твоим, Имже и веки сотворил еси, Иже сый сияние славы Твоея и начертание ипостаси Твоея, нося же вся глаголом силы Своея, не хищение непщева еже быти равен Тебе, Богу и Отцу, но Бог сый превечный, на земли явися и человеком споживе. И от Девы Святыя воплощся, истощи Себе, зрак раба прием, сообразен быв телу смирения нашего, да нас сообразны сотворит образу славы Своея. Понеже бо человеком грех вниде в мiр и грехом смерть, благоволи Единородный Твой Сын, сый в недрех Тебе, Бога и Отца, быв от жены, Святыя Богородицы и Приснодевы Марии, быв под законом, осудити грех во плоти Своей, да во Адаме умирающе, оживотворятся в самем Христе Твоем. И пожив в мiре сем, дав повеления спасительная, отставив нас прелести идольския, приведе в познание Тебе, истиннаго Бога и Отца, стяжав нас Себе, люди избранны, царское священие, язык свят. И очистив водою, и освятив Духом Святым, даде Себе измену смерти, в нейже держими бехом, продани под грехом, и сошед крестом во ад, да исполнит Собою вся, разреши болезни смертныя. И воскрес в третий день, и путь сотворив всякой плоти к воскресению из мертвых, зане не бяше мощно держиму быти тлением начальнику жизни, бысть начаток умерших, перворожден из мертвых, да будет Сам вся, во всех первенствуяй. И возшед на небеса, седе одесную величествия Твоего на высоких, иже и приидет воздати комуждо по делом его. Остави же нам воспоминания спасительнаго Своего страдания сия, яже предложихом по Его заповедем. Хотя бо изыти на вольную и приснопамятную, и животворящую Свою смерть, в нощь, в нюже предаяше Себе за живот мiра, прием хлеб на святыя Своя и пречистыя руки, показав Тебе, Богу и Отцу, благодарив, благословив, освятив, преломив,

Иерей: Даде святым Своим учеником и Апостолом, рек: приимите, ядите, сие есть Тело Мое, еже за вы ломимое, во оставление грехов.

Хор: Аминь.

ИерейПодобне и чашу от плода лознаго прием, растворив, благодарив, благословив, освятив,

Иерей: Даде святым Своим учеником и Апостолом, рек: пийте от нея вси, сия есть Кровь Моя Новаго завета, яже за вы и за многи изливаемая во оставление грехов.

Хор: Аминь.

Иерей: Сие творите в Мое воспоминание: елижды бо аще ясте Хлеб сей и Чашу сию пиете, Мою смерть возвещаете, Мое воскресение исповедаете. Поминающе убо, Владыко, и мы спасительная Его страдания, животворящий Крест, тридневное погребение, еже из мертвых воскресение, еже на небеса возшествие, еже одесную Тебе, Бога и Отца, седение, и славное, и страшное Его второе пришествие.

Иерей: Твоя от Твоих Тебе приносяще, о всех и за вся.

Хор: Тебе поем,/ Тебе благословим,/ Тебе благодарим, Господи,/ и молим Ти ся, Боже наш.

Иерей: Сего ради, Владыко Пресвятый, и мы, грешнии и недостойнии раби Твои, сподобльшиися служити святому Твоему жертвеннику, не ради правд наших, не бо сотворихом что благо на земли, но ради милости Твоея и щедрот Твоих, яже излиял еси богатно на ны, дерзающе приближаемся святому Твоему жертвеннику. И предложше вместообразная святаго Тела и Крове Христа Твоего, Тебе молимся, и Тебе призываем, Святе святых, благоволением Твоея благости приити Духу Твоему Святому на ны и на предлежащия Дары сия, и благословити я, и освятити, и показати.

Диакон полагает рипиду, юже держаше, или покров, и приходит близ священника, и покланяются оба трижды пред святою трапезою, и молящеся в себе: Боже, очисти мя, грешнаго, и помилуй мя.

Иерей: Господи, иже Пресвятаго Твоего Духа в третий час Апостолом Твоим низпославый, Того, Благий, не отими от нас, но обнови нас, молящих Ти ся. (на каждый стих)

Диакон: Сердце чисто созижди во мне, Боже, и дух прав обнови во утробе моей.

Не отвержи мене от лица Твоего, и Духа Твоего Святаго не отыми от мене.

Диакон, указывая орарем на святой хлеб: Благослови, владыко, святый хлеб.

Иерей, благословляя: Хлеб убо сей, самое Честное Тело Господа и Бога и Спаса нашего Иисуса Христа.

Диакон: Аминь. Благослови, владыко, святую чашу.

Иерей, благословляя: Чашу же сию, самую Честную Кровь Господа и Бога и Спаса нашего Иисуса Христа.

Диакон: Аминь.

Иерей: Излиянную за живот мира.

Диакон: Аминь.

Диакон, указывая орарем на святые Дары: Аминь. Благослови, владыко, обоя.

Иерей, благословляя святые Дары вместе: Преложив Духом Твоим Святым.

Диакон: Аминь, аминь, аминь. Помяни мя, святый владыко, грешнаго.

Иерей: Нас же всех, от единаго хлеба и чаши причащающихся, соедини друг ко другу, во единаго Духа Святаго причастие. И ни единаго нас в суд или во осуждение сотвори причаститися святаго Тела и Крове Христа Твоего, но да обрящем милость и благодать со всеми святыми, от века Тебе благоугодившими, праотцы, отцы, патриархи, пророки, Апостолы, проповедники, благовестники, мученики, исповедники, учительми и со всяким духом праведным, в вере скончавшимся.

Иерей: Изрядно о Пресвятей, Пречистей, Преблагословенней, Славней Владычице нашей Богородице и Приснодеве Марии.

Задостойник

Хор: О Тебе радуется, Благодатная всякая тварь,/ Ангельский собор и человеческий род,/ освященный храме и раю словесный,/ девственная похвало,/ из Неяже Бог воплотися,/ и Младенец бысть, прежде век Сый Бог наш:/ ложесна бо Твоя престол сотвори/ и чрево Твое пространнее Небес содела.// О Тебе радуется, Благодатная, всякая тварь, слава Тебе.

Иерей: Святаго Иоанна Пророка, Предтечи и Крестителя, святых и всехвальных Апостол, святаго (имярек), егоже и память совершаем, и всех святых Твоих, ихже молитвами посети нас, Боже.

И помяни всех прежде усопших о надежди воскресения жизни вечныя.

О спасении, посещении, оставлении грехов рабов Божиих (имярек).

О покои и оставлении грехов душ раб Твоих (имярек), на месте светле, отонудуже отбеже печаль и воздыхание, упокой, Боже наш.

И покой их, идеже присещает свет лица Твоего.

Еще молим Ти ся, помяни, Господи, святую Твою соборную и апостольскую Церковь, юже от конец даже до конец вселенныя, и умири ю, юже наздал еси честною кровию Христа Твоего, и святый храм сей утверди даже до скончания века.

Помяни, Господи, иже дары сия Тебе принесших, и о нихже, и имиже, и за нихже сия принесоша.

Помяни, Господи, плодоносящих и добротворящих во святых Твоих церквах, и поминающих убогия: воздаждь им богатыми Твоими и небесными даровании, даруй им вместо земных небесная, вместо временных вечная, вместо тленных нетленная.

Помяни, Господи, иже в пустынях и горах, и вертепех, и пропастех земных.

Помяни, Господи, иже в девстве и благоговении, и постничестве, и в чистем жительстве пребывающих. Вспомни, Господи, пребывающих в девстве и благоговении и подвижничестве и чистой жизни. Помяни, Господи, богохранимую страну нашу [Российскую и верныя люди ея], даруй [нам] глубокий и неотъемлемый мир, возглаголи в сердцах [всех, иже во власти суть,] благая о Церкви Твоея и всех людех Твоих, да в тишине их тихое и безмолвное житие поживем во всяком благочестии и чистоте.

Помяни, Господи, всякое начало и власть, и иже в палате братию нашу и все воинство. Благия во благости соблюди, лукавыя благи сотвори благостию Твоею.

Помяни, Господи, предстоящия люди, и ради благословных вин оставльшихся, и помилуй их и нас по множеству милости Твоея: сокровища их исполни всякаго блага, супружества их в мире и единомыслии соблюди, младенцы воспитай, юность настави, старость поддержи, малодушныя утеши, расточенныя собери, прельщенныя обрати, и совокупи святей Твоей соборней и апостольстей Церкви. Стужаемыя от духов нечистых свободи, плавающим сплавай, путешествующим сшествуй, вдовицам предстани, сирых защити, плененныя избави, недугующия исцели. На судищи, и в рудах, и в заточениих, и в горьких работах, и всякой скорби, и нужде, и обстоянии сущих, помяни, Боже. И всех требующих великаго Твоего благоутробия и любящих нас, и ненавидящих, и заповедавших нам, недостойным, молитися о них, и вся люди Твоя помяни, Господи Боже наш, и на вся излей богатую Твою милость, всем подая яже ко спасению прошения. И ихже мы не помянухом, неведением, или забвением, или множеством имен, сам помяни, Боже, ведый коегождо возраст и именование, ведый коегождо от утробы матере его. Ты бо еси, Господи, помощь безпомощным, надежда безнадежным, обуреваемым спаситель, плавающим пристанище, недугующим врач. Сам всем вся буди, ведый коегождо, и прошение его, дом и потребу его. Избави, Господи, град сей (или весь сию, или святую обитель сию), и всякий град и страну от глада, губительства, труса, потопа, огня, меча, нашествия иноплеменных и междоусобныя брани.

Иерей: В первых помяни, Господи, великаго господина и отца нашего Кирилла, Святейшаго Патриарха Московскаго и всея Руси, ихже даруй святым Твоим церквам, в мире, целых, честных, здравых, долгоденствующих, право правящих слово Твоея истины.

Хор: И всех, и вся.

Иерей: Помяни, Господи, всякое епископство православных, право правящих слово Твоея истины.

Помяни, Господи, по множеству щедрот Твоих, и мое недостоинство, прости ми всякое согрешение, вольное же и невольное, и да не моих ради грехов возбраниши благодати Святаго Твоего Духа от предлежащих Даров.

Помяни, Господи, пресвитерство, еже во Христе диаконство, и весь священнический чин, и ни единаго же нас посрамиши, окрест стоящих святаго Твоего жертвенника.

Посети нас благостию Твоею, Господи, явися нам богатыми Твоими щедротами, благорастворены и полезны воздухи нам даруй, дожди мирны земли ко плодоносию даруй. Благослови венец лета благости Твоея, утоли раздоры церквей, угаси шатания языческая, еретическая востания скоро разори силою Святаго Твоего Духа. Всех нас приими в Царство Твое, сыны света и сыны дне показавый, Твой мир и Твою любовь даруй нам, Господи Боже наш, вся бо воздал еси нам.

Иерей: И даждь нам единеми усты и единем сердцем славити и воспевати пречестное и великолепое имя Твое, Отца, и Сына, и Святаго Духа, ныне и присно, и во веки веков.

Хор: Аминь.

Иерей: И да будут милости великаго Бога и Спаса нашего Иисуса Христа со всеми вами.

Хор: И со духом твоим.

Диакон: Вся святыя помянувше, паки и паки миром Господу помолимся. (ектения просительная)

Молитва перед святым Причащением

Иерей: Боже наш, Боже спасати, Ты нас научи благодарити Тя достойно о благодеяниих Твоих, ихже сотворил еси и твориши с нами. Ты, Боже наш, приемый Дары сия, очисти нас от всякия скверны плоти и духа, и научи совершати святыню в страсе Твоем, яко да чистым свидетельством совести нашея, приемлюще часть святынь Твоих, соединимся святому Телу и Крови Христа Твоего. И приемше их достойне, имамы Христа живуща в сердцах наших, и будем храм Святаго Твоего Духа. Ей, Боже наш, и да ни единаго же нас повинна сотвориши, страшным Твоим сим и небесным Тайнам, ниже немощна душею и телом, от еже недостойне сих причащатися. Но даждь нам даже до последняго нашего издыхания, достойне приимати часть святынь Твоих в напутие жизни вечныя, во ответ благоприятен, иже на страшнем судищи Христа Твоего, яко да и мы со всеми святыми, от века Тебе благоугодившими, будем причастницы вечных Твоих благ, ихже уготовал еси любящим Тя, Господи.

Иерей: И сподоби нас, Владыко, со дерзновением, неосужденно смети призывати Тебе, Небеснаго Бога Отца, и глаголати:

Молитва Господня

Люди: Отче наш, Иже еси на небесех, да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.

Иерей: Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Хор: Аминь.

Иерей: Мир всем.

Хор: И духови твоему.

Диакон: Главы ваша Господеви приклоните.

Хор: Тебе, Господи.

Молитва главопреклонения

Иерей: Владыко Господи, Отче щедрот и Боже всякаго утешения, приклоньшия Тебе своя главы благослови, освяти, соблюди, укрепи, утверди, от всякаго дела лукава отстави, всякому же делу благому сочетай, и сподоби неосужденно причаститися пречистых сих и животворящих Твоих Таин, во оставление грехов, в Духа Святаго причастие.

Иерей: Благодатию, и щедротами, и человеколюбием Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно, и во веки веков.

Хор: Аминь.

Иерей: Вонми, Господи Иисусе Христе Боже наш, от святаго жилища Твоего, и от престола славы Царствия Твоего, и прииди во еже освятити нас, иже горе со Отцем седяй, и зде нам невидимо спребываяй. И сподоби державною Твоею рукою преподати нам Пречистое Тело Твое и Честную Кровь, и нами всем людем.

Боже, очисти мя, грешнаго, и помилуй мя. (трижды)

Закрываются Царские врата.

Диакон: Вонмем.

Иерей: Святая святым.

Хор: Един свят,/ един Господь,/ Иисус Христос,/ во славу Бога Отца./ Аминь.

Хвалите Господа с небес,/ хвалите Его в вышних.

В память вечную будет праведник,/ от слуха зла не убоится.

Аллилуия, аллилуия, аллилуия.

Причастие

Открываются Царские врата.

Диакон: Со страхом Божиим и верою приступите.

Хор: Благословен Грядый во имя Господне, Бог Господь и явися нам.

Иерей: Верую, Господи, и исповедую, яко Ты еси воистинну Христос, Сын Бога живаго, пришедый в мир грешныя спасти, от нихже первый есмь аз. Еще верую, яко сие есть самое пречистое Тело Твое, и сия есть самая честная Кровь Твоя. Молюся убо Тебе: помилуй мя и прости ми прегрешения моя, вольная и невольная, яже словом, яже делом, яже ведением и неведением, и сподоби мя неосужденно причаститися пречистых Твоих Таинств, во оставление грехов и в жизнь вечную. Аминь.

Вечери Твоея тайныя днесь, Сыне Божий, причастника мя приими; не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во Царствии Твоем.

Да не в суд или во осуждение будет мне причащение Святых Твоих Таин, Господи, но во исцеление души и тела.

Во время Причащения людей:

Хор: Тело Христово приимите, Источника безсмертнаго вкусите.

После Причащения людей:

Хор: Аллилуия, аллилуия, аллилуия.

После причащения мирян служители входят в алтарь. Священник ставит Святую Чашу на престол, а диакон, взяв святой дискос читает воскресные и пасхальные песнопения:

Воскресение Христово видевше, / поклонимся Святому Господу Иисусу, / единому безгрешному, / Кресту Твоему покланяемся, Христе, / и святое Воскресение Твое поем и славим: / Ты бо еси Бог наш, / разве Тебе иного не знаем, / имя Твое именуем. / Приидите вси вернии, / поклонимся Святому Христову Воскресению: / се бо прииде Крестом радость всему миру. / Всегда благословяще Господа, / поем Воскресение Его: / распятие бо претерпев, / смертию смерть разруши.

Светися, светися, / новый Иерусалиме: / слава бо Господня / на тебе возсия. / Ликуй ныне / и веселися, Сионе. / Ты же, Чистая, красуйся, Богородице, / о востании Рождества Твоего.

О Пасха велия и священнейшая, Христе! / О мудросте, и Слове Божий, и сило! / Подавай нам истее Тебе причащатися, / в невечернем дни Царствия Твоего.

Затем диакон опускает в потир частицы, вынутые из просфор, лежащих на дискосе, со словами:

Отмый, Господи, грехи поминавшихся зде Кровию Твоею Честною, молитвами святых Твоих.

Иерей: Спаси, Боже, люди Твоя, и благослови достояние Твое.

Хор: Видехом свет истинный,/ прияхом Духа Небеснаго,/ обретохом веру истинную,/ нераздельней Троице покланяемся,// Та бо нас спасла есть.

Во время пения священник трижды кадит Святые Дары, глаголя:

Иерей: Вознесися на Небеса, Боже, и по всей земли слава Твоя.

Иерей: Всегда, ныне и присно, и во веки веков.

Хор: Аминь. Да исполнятся уста наша/ хваления Твоего Господи,/ яко да поем славу Твою,/ яко сподобил еси нас причаститися/ Святым Твоим, Божественным, безсмертным и животворящим Тайнам,/ соблюди нас во Твоей святыни/ весь день поучатися правде Твоей.// Аллилуиа, аллилуиа, аллилуиа.

Ектения заключительная

Диакон: Прости приимше Божественных, святых, пречистых, безсмертных, небесных и животворящих, страшных Христовых Таин, достойно благодарим Господа.

Хор: Господи, помилуй. (на оба прошения)

Заступи, спаси, помилуй и сохрани нас, Боже, Твоею благодатию.

Диакон: День весь совершен, свят, мирен и безгрешен испросивше, сами себе и друг друга, и весь живот наш Христу Богу предадим.

Хор: Тебе, Господи.

Благодарственная молитва

Иерей: Благодарим Тя, Господи Боже наш, о причащении святых пречистых, безсмертных и небесных Твоих Таин, ихже дал еси нам во благодеяние, и освящение, и исцеление душ и телес наших. Сам, Владыко всех, даждь быти нам причастию святаго Тела и Крове Христа Твоего в веру непостыдну, в любовь нелицемерну, в преумножение премудрости, во исцеление души и тела, во отгнание всякаго сопротивнаго, в снабдение заповедей Твоих, во ответ благоприятен, иже на страшнем судищи Христа Твоего.

Иерей: Яко Ты еси освящение наше, и Тебе славу возсылаем, Отцу, и Сыну, и Святому Духу, ныне и присно, и во веки веков.

Хор: Аминь.

Иерей: С миром изыдем.

Хор: О имени Господни.

Диакон: Господу помолимся.

Хор: Господи, помилуй.

Заамвонная молитва:

Иерей: Благословляяй благословящия Тя, Господи, и освящаяй на Тя уповающия, спаси люди Твоя и благослови достояние Твое, исполнение Церкве Твоея сохрани, освяти любящия благолепие дому Твоего: Ты тех возпрослави Божественною Твоею силою, и не остави нас, уповающих на Тя. Мир мiрови Твоему даруй, церквам Твоим, священником, воинству и всем людем Твоим. Яко всякое даяние благо, и всяк дар совершен свыше есть, сходяй от Тебе Отца светов, и Тебе славу, и благодарение, и поклонение возсылаем, Отцу, и Сыну, и Святому Духу, ныне и присно, и во веки веков.

Хор: Аминь. Буди Имя Господне благословено от ныне и до века. (трижды)

Молитва на потребление святых Даров

Иерей: Исполнися и совершися елико по нашей силе, Христе Боже наш, Твоего смотрения таинство. Имеем бо смерти Твоея память, видехом воскресения Твоего образ, наполнихомся безконечныя Твоея жизни, насладихомся неистощаемыя Твоея пищи, еяже и в будущем веце всем нам сподобитися благоволи, благодатию безначальнаго Твоего Отца, и Святаго и благаго и животворящаго Твоего Духа, ныне и присно, и во веки веков. Аминь.

Иерей: Благословение Господне на вас, Того благодатию и человеколюбием, всегда, ныне и присно, и во веки веков.

Хор: Аминь.

Иерей: Слава Тебе, Христе Боже, упование наше, слава Тебе.

Хор: Слава, и ныне. Господи, помилуй. (трижды) Святейший владыко, благослови.

Отпуст

Иерей: Воскресый из мертвых Христос, Истинный Бог наш, молитвами Пречистыя Своея Матере, святых славных и всехвальных Апостол (и святаго имярек, егоже есть храм и егоже есть день), святых и праведных богоотец Иоакима и Анны, и всех святых, помилует и спасет нас, яко Благ и Человеколюбец.

Многолетие

Хор: Великаго Господина и Отца нашего Кирилла,/ Святейшаго Патриарха Московского и всея Руси,/ богохранимую страну нашу Российскую,/ настоятеля, братию и прихожан святаго храма сего/ и вся православныя христианы,// Господи, сохрани их на многая лета.

Ис полла эти дэспота.

Добавлено: 17-04-2021, 19:26
0
311

Похожие публикации


Добавить комментарий


Наверх